香港新浪網 MySinaBlog
« 上一篇 | 下一篇 »
隱形富豪投資王 | 21st Jun 2012, 07:17 | 金手指 [孫柏文] | (363 Reads)

「李顯揚,你呃人」

兩個禮拜前,孫柏文就寫咗篇題為《星獅是無能還是奸?》嘅文。事情就係喺香港上市嘅星獅地產(535),其實有間母公司,就係新加坡嘅星獅集團 Fraser and Neave。咁呢間新加坡國父李光耀細仔李顯揚做主席嘅母公司,5月時宣佈提出初步私有化星獅地產嘅建議。


依然冇計深圳地皮
當時個初步建議係,根據星獅地產為自己計嘅資產淨值,母公司肯出資產淨值八五折嘅價向小股東回購股份。初頭我聽到話八五折,覺得 ok,算數,唔可以要求太高。雖然最好嘅方法,就係將旗下物業及地皮,以公開拍賣形式賣出,之後就將現金按股份比例還番畀股東,不過八五折就八五折。
咁點解我之後會問,究竟星獅是無能還是奸?原因就係我再睇星獅地產點樣計資產淨值時,發覺佢哋冇將深圳一塊地皮完全入賬!你話你出資產淨值嘅大幅折讓價,例如三折,起碼都係明刀明槍搶錢,現有機制起碼可以畀機會小股東抗議。不過當你用啲陰陰濕濕嘅計算方法,去計自己個資產淨值,根本就係想呃人。
當然,5月出台嘅建議,只係初步建議。我就好傻好天真咁諗:「可能佢哋因內部嘅會計制度,睇漏眼啫。提提佢哋就唔會睇漏啦!」所以之後我就喺《蘋果日報》同《商台》度呼籲,仲要就啲新加坡人用英文話:「 Most of us are dumb, but none of us are blind。」
件事去到呢個禮拜有新發展,早幾日星獅地產出咗兩份通告。第一份係話星獅母公司將會企硬唔提價。我一睇真係 MM聲,你呢個李顯揚喺被人提醒之後,都仲可以咁厚顏無恥,由李顯揚 is a Crook(老千)?變成李顯揚 is a Crook。
乜啲新加坡人做嘢係咁架?不過冇辦法,大家唔發覺嗰啲成日話我哋香港要學新加坡嘅人,不論係政客或基金經理,身上都散發着嗰種小家嘅味道咩?所以我 Disappointed? Yes。 Surprised? No。


社運份子講明示威
不過最吊詭嘅地方,就係星獅地產繼話唔提價嘅通告後,同日出嘅第二份通告。第二份講乜?就係話私有化正式建議要押後先宣佈。我兩個禮拜前講過星獅地產後,我收到好幾個股東嘅電郵,咁最新出嘅兩份通告,亦令佢哋好嬲同埋唔明解。理由係星獅地產嘅資產唔多亦唔複雜,點解要押後公佈正式建議?
我就一向從好嗰方面諗,好似葉劉淑儀或花旗國班國父話齋,個系統好,人壞時,都抵受得住。咁喺私有化過程,首先係會有個獨立財務顧問,為小股東睇吓例如個資產淨值究竟有冇計得啱。星獅地產要押後公佈正式建議,可能係因為搵唔到有大行同意佢哋嘅資產淨值計法。甚至可能港交所(388)行政總裁李小加落令話要睇實單嘢,為小股東出力。
點都好,其中一個小股東,係我識咗好耐嘅社運份子。佢已經話到明,一定會接受以準確計算資產淨值嘅八五折方案,不過一旦又係以之前嘅資產淨值計算,佢一定示威。示威一定包括喺外國財經傳媒前,燒新加坡國旗。 Chairman Lee Hsien Yang, consider yourself warned。

留言(0) | 引用(0) | 話題(股市)