香港新浪網 MySinaBlog
« 上一篇 | 下一篇 »
隱形富豪投資王 | 7th Jun 2012, 07:23 | 金手指 [孫柏文] | (411 Reads)

星獅是無能還是奸?

禮拜二,孫柏文寫咗篇題為《李顯揚,提價吧!》嘅文,事關新加坡李光耀細仔李顯揚做主席嘅星獅集團,提出要私有化喺香港上市嘅子公司星獅地產(535)。
原本睇牌面,佢哋用資產淨值 NAV嘅八五折去私有化,唔算搵笨,算 ok。點知睇佢哋份建議書計 NAV時,成塊深圳靚地嘅價未計落去,有冇搞錯!塊地喺同香港連接嘅西部通道附近,係靚地。


李光耀細仔做舵手
今日重提嘅原因,係因為禮拜二有位讀者來 Email問:「唔好理佢計埋塊地有幾多 NAV,佢哋喺建議書冇計就只得兩個解釋,一係 Incompetent(無能),一係 Crooked(奸)。咁新加坡人,冇理由係無能,所以同佢哋講提價有乜用?家買就仲冇 Point,因為佢哋話用28仙私有化,宣佈建議後就日日喺27仙同27.5仙度徘徊,冇肉食。」其實,呢個問題除呢位讀者外,都有唔少 Uncle同 Auntie問,所以今日一次過答大家。
我同意,如果一間上市公司嘅母公司提出私有化建議時,計 NAV都可以計漏,就真的是,一係無能一係奸。而對香港股民來講,新加坡人可以好奸,絕對可以係 Crooked。唔使多講,大家 Google吓「榮豐國際」(063)同我個名,就會搵到新加坡人搵笨嘅案例。
不過今次我覺得唔同,因為如果用在港上市嘅大陸公司為例,好搵笨嘅「榮豐」就係民企。不過星獅地產同佢母公司星獅集團 Fraser and Neave,主席係新加坡國父李光耀個仔李顯揚,星獅應該係似大陸啲最大「國企」。當年中石油(857)自己上市後,要私有化吉林化工等改革開放先頭卒,都係用啲公平、小股東冇嘈嘅價去做,冇理由星獅做唔到。
當然,不能否認嘅係佢哋喺呢一刻擺喺枱面嘅建議,真係冇計深圳塊地。不過冇計埋,係咪真係不是無能則是奸?點解有計其他嘢,不過就係冇計呢塊地呢?


計漏深圳地有原因
呢塊深圳地,其實一早已經係喺公司嘅手中,不過就係因為喺手咁耐都冇發展,所以深圳市政府就唔高興。點知公司被新加坡嘅星獅集團 Takeover後,喺2010年成功同深圳市政府達成協議,又可以攞番塊地來發展。
之後,就可能因法律程序未正式完成,跟住就入數又可能趕唔切期限,又可能連測量師份報告未到等原因,就係咁,到2012年5月頭出私有化建議時,都未正式可以將塊地嘅全面價值計落資產淨值度。李顯揚係個軍人,深知自己身份,老豆阿哥係邊個,應該對小股東等弱勢社群更小心,唔會奸到咁,做個 Crook。
所以如果問我,我都係嗰句:「 We shall find out via Frasier Property( China) Ltd whether Fraser and Neave is a crooked organization and whether its Chairman Lee Hsien Yang is a crook. And I don't believe Lee Hsien Yang is a crook.」
最後,你究竟應唔應該喺呢個位買星獅地產?咁你就要問吓自己,究竟李顯揚會唔會做啱嘅事。靜候星獅地產私有化嘅正式 Prospectus。

留言(0) | 引用(0) | 話題(股市)