香港新浪網 MySinaBlog
« 上一篇 | 下一篇 »
隱形富豪投資王 | 17th May 2012, 07:21 | 金手指 [孫柏文] | (288 Reads)

QE3嚟緊啦!

孫柏文都唔記得第一次講歐債問題係幾時,又或者講過幾多次,不過今日又要講。哎,又來啦。
兩個禮拜前希臘同法國分別舉行大選,希臘亂到無人可以籌組到政府,終於宣佈要下個月重新再選過;法國就選咗個社會黨嘅奧朗德做新任總統,講到明要大洗特洗去刺激經濟,搞到恒指兩個禮拜以來跌到九個一皮,前日先結束八連跌,噚日就即刻又插過600點。


緊縮開支冇發生過
要洗錢刺激經濟,首先就要解決薩爾科齊早前簽落嗰份財政協定,所以一讀完段就職誓詞,就馬上搭飛機去搵德國鐵娘子講數。不過唔知係天氣唔好,定係上帝有心幽班法國佬一默,奧朗德搭嗰架飛機,竟然喺出發無耐就畀雷電劈中,結果要折返巴黎搭過第二架,邪到呢。
奧朗德當選法國總統,同埋希臘搞成咁嘅樣,好多人話係反映民眾厭惡緊縮開支財政政策。不過好多嘢其實呃唔到人,踢爆中國民企做假時我哋有渾水,踢爆歐洲政客講大話嘅亦有 National Review。早前獅子山學會王弼就 Forward咗一篇文畀我睇,綜合成篇報道,可以簡單咁歸納出四點,英法兩個根本從來無真正減過開支,意大利減開支都只是減咗一年咁大把,即使西班牙、希臘有減開支,減嘅幅度根本係遠遠未夠佢哋真正需要減嗰條數,全部上述五個國家洗嘅錢,比海嘯之前根本係有過之而無不及。只要拼一拼圖,所有嘢就好似妖魔鬼怪喺照妖鏡前面咁樣,無所遁形。
既然係咁,緊縮開支又有乜好怕喎?反正從來都未發生過。
點都好,歐洲嗰幾隻豬仔病入膏肓早已經係不爭嘅事實,不過差在幾時真正宣佈 Certified啫。其實希臘班人自己都知自己事,以佢哋國家家嗰個情況,佢哋就算再緊縮30年,都無可能還到債,經濟亦都見唔到有任何復蘇嘅希望。既然係咁,不如索性破產,或者18年後又係一條好漢,最少,捱少10幾年嘛,係咪?


可惜就係布魯塞爾班人話唔得,老實講,本來希臘破產就唔關佢哋事,可惜佢哋國家嗰啲銀行就揸重歐豬國債,希臘一爆煲就保證火燒連環船,到時就唔知有幾多間銀行張 Balance Sheet會因為資不抵債而關門大吉。多唔好講,當希臘(好快嚟緊啦)宣佈全國銀行「休息」,有存戶對住電視機因冇得提款玩自殺,睇電視新聞嘅西班牙人同意大利人你估會點做?仲唔聽日去銀行攞錢。


儲局有藉口再放水
蔓延方法就係咁簡單,相信香港銀行都會同佢哋斷絕來往。
咁各位「金手指」,去到呢刻,又會係邊個出場嘅時候?
做得我 Fan屎,都會答:「歐央行,可能仲有聯儲局一齊玩!」如果大家記得少少歷史,都會知道歐央行人係鍾意打茅波嘅,仲要係屈機嗰隻。當歐豬被降評級時,放寬銀行抵押品的要求,之前堅持話唔買國債到最後又係大手掃貨,到之後仲要推 LTRO這個另類版 QE,以超低息借錢畀銀行去買歐豬國債,根本次次都係無視規則打茅波,為救銀行不惜一切。
所以,我哋都有理由相信,如果歐豬真係有乜冬瓜豆腐,歐央行都係會出手打救,直接買銀行股票、債券去注資,以保住啲銀行嘅。
問題係,家呢啲嘢都未發生,嗰市都應該仲會係咁跌落去。速度快慢就難睇啲。不過最尾一句,年初時啲人話政治上,聯儲局最後一個可以宣佈 QE嘅機會喺6月個會。
到上個禮拜為止,個個都話佢哋冇藉口。家呢?差唔多有啦。

留言(0) | 引用(0) | 話題(股市)