香港新浪網 MySinaBlog
« 上一篇 | 下一篇 »
隱形富豪投資王 | 15th May 2012, 07:19 | 金手指 [孫柏文] | (256 Reads)

大行,你呃人!

哈里波特裏的無面人佛地魔、海洋中自由暢泳的巨鯨、金融海嘯中獨善其身的投資銀行,三者關係,大纜都扯唔埋,結果係一單交易,令關係曝光,仲要係見光死。讀者一定知講緊摩根大通。呢3、4年,人人捧摩通行政總裁戴蒙做神,面對海嘯而屹立不倒,結果係千年道行一朝喪。
現時正值美國大選年,陰謀論講,件事一定會繼續無限放大,政治影響大過一切。政客搬出沃爾克法規,打到你殘,到時仲邊有啖好食。戴蒙唔認唔認還需認的處事方式,咪同我哋特區嘅唐唐似到十足十。戴蒙在上月時,仲以為耍走記者,話人「小題大做」就冚得住,未免天真咗。
唔係想「數」戴蒙咁簡單,係為美國投資銀行界而蒙羞。一條問題考起晒佢哋,「如果即時實行沃爾克法規,大行係咪會金盤洗手唔做?唔搞對賭?唔做坐盤交易?」大家都心裏有數。睇到個最新調查,幾有趣,《華爾街日報》做咗個亞洲最佳分析師調查,結果發現叫人沽貨的分析員最幫到客賺錢。叫人做空很難,突然轉軚,叫個客跟你買就仲難。


樂天虎轉軚轉得好
內地最佳分析員係佢, Scott Laprise(樂天虎),冇錯,係洋人。最初佢睇好比亞迪(1211),仲叫大家買貨,睇中比亞迪電動汽車技術。不過,由佢年幾、兩年在北京都買唔到 F3DM型號油電混合電動車開始,佢就由愛,變成叫沽,因為佢從來都擁有唔到 F3DM。結果,佢轉得好,由2010年夏天叫人沽嗰刻開始,股價累跌59%,幫人賺大錢。
故事話你聽,肯認衰肯轉軚,死期未必將至。你畀咁多錢間投行幫你管理資產,到頭來,可能變成散戶一個。話你知,個調查指,排名最低的投行,係摩根士丹利,證明你第日可在內地或在特區求其搵間行,都可能賺得多錢過佢哋!

留言(0) | 引用(0) | 話題(股市)